Warbixin Dheer oo Ku Saabsan Qabri Dahare

Qabri-Dahar (CakaaraNews) HORDHAC: Gobolka Qoraxay wuxuu ku yaalaa bariga Ethiopia gaar ahaan Dowlad Deegaanka Soomaalida wuxuuna ka kooban yahay 4 Degmo oo kala ah: Degmada Q/dahare, Degmada Shilaabo, Degmada Dhobaweyn, & Degmada Shaygoosh

SAFARKA QABDIDAHARE:

22-6-2010 Talaado ayaan ka degnay Garoonka Diyiiradaha ee Degmada Q/dahare halkaa waxaa si diiran noogu soo dhaweeyay Sh.Maxamed Dubad Xirsi iyo odayaal reer qoraxay ah kadib waxaan u dhaadhacnay magaalada waxaana ku degnay Hotel Qoraxay oo ku yaala magaalada badhtankeeda.

JAWIGA MAGAALADA

Magaalada jawigeedu aad buu u wanaagsanaa cimiladuna waxay ahayd mid dhex dhexaad ah cirkuna daruuro fara badan ayuu lahaa waxaana lagu jiray xilliga Gamashiga.

MUUQAALKA MAGAALADA
Magaalada muuqaalkeedu aad buu u wanaagsanaa dadku way is dhex marayeen Ganacsi weyna waa uu ka socday waxaana ku hagaagnay xilli magaalada ay soo galeen gawaadhi fara badan oo siday bagaash iyo raashino kala duwan, dadkuna waxay ku mashquulsanaayeen kala daabulka gawaadhidii siday raashinka.
dhanka kale waxay indhahaygu qabanayeen ragga magaalada degen iyo agagaaraheedaba iayagoo Maqaaxiyaha Magaalada si weyn uga shaaheynaya iskuna wareysanaya.

DHAQDHAQAAQA GANACSI EE MAGAALADA:

Magaalada waxaa ka jiray ganacsi aan sidaa u sii buurnayn lakiin kolka loo eego sidii ay ahayd 2bilood ee la soo dhaafay waxaa la odhan karaa is badal ayaa ku yimid halka bilihii la soo dhaafay ay maciishadu cirka isku shareertay ayay maanta gaadhay abid meeshii ugu hooseysay.
shaxdan hoos ku qoran waxay inoo cadeynaysaa halka ay eegga wax marayaan iyo halkii labadii bilood ee la soo dhaafay ay wax marayeen.

aynu ku horeynee Sokorta ayaa 50kg waxay ahayd 1200 Birr maantana waxay ahayd 550 Birr Burka ayaa isna wuxuuahaa 25kg 700 Birr halka maanta uu marayo250 Birr Bariiska ayaa isna ahaa 25 kg 700 Birr halka maanta uu ahaa 300 Birr, Baastada ayaa iyana ahayd 10kg 210 Birr halka maanta lakala siisanayay160 Birr Saliida ayaa iyana ahayd markii hore 10 Ltr 440 Birr halka maanta lakala siisanayay 220 Birr.

F.G. waa raashinka Quutul daruuriga ah waxaa jira bagaash laakiin kuwan ayaan u aragnay in ay muhiim yihiin maadaadama ay yihiin Aas aaska nolosha.

Shaxdan waxaa ka muuqda is badal weyn oo u dhexeeyo sicirka raashinka kii hore iyo kan maanta lagu kala iibsanayay Suuqa weyn ee magaalada Q/dahare, ganacsatada magaalada oo aynu wax ka weydiinay ayaa inoo sheegay in kala go  raashinka ah uu jiray bilooyinkii la soo dhaafay taasna ay sabab u tahay in maciishadu qaaliyowdo halka raashinka qaar lagaba waayay intii aanu raashinkan dambe iman maantana ay aad ugu faraxsanyihiin halka ay wax marayaan ayna waliba rajaynayaan in hoos u dhac kale uu ku yimaado maalmaha soo socda.

WAFIDIGII UWSLF IYO Q/DAHARE

Wafdigii ka socday UWSLF ee gaadhay magaalada Q/dahare oo uu Hoggaaminayay Sh.Maxamed Askar Khaliif ayaa intii uu joogay magaalada waxay kulamo la yeesheen qaybaha kala duwan ee bulshada ku dhaqan magaalada Q/dahare.
Ugu horeyn sheekhu wuxuu muxaadarooyin ka jeediyay labada Masjid ee magaalada ugu waawayn iyadoo uu khudbadii jimcihii 25-06-201- ee la soo dhaafay ka akhriyay Masjidka wayn ee magaalada khudbo aad u wanaagsan oo ay ku diirsadeen shacabka reer qoraxay oo ku saabsanayd nabadda iyo ahmiyada ay leedahay iyo waliba in gacmaha la is qabsado sidii Dalka loo hormarin lahaa, sheekha oo ku dheeraaday wacdi afsomali ah khudbada ka hor ayaa tibaaxay ahmiyadda uu islaamku siiyay nabadda isagoo sheegay in nabaddu tahay shey qaali ah loona baahanyahay in laga wada shaqeeyo sidii loo xaqiijin lahaa.
ugu dambayntii sheekhu wuxuu dardaaran u jeedin shacabka Reer Qoraxay isagoo ugu dardaarmay in la is cafiyo wixii horena aan dib loogu noqon loona jeesto xagga Horumarka.

SHIR KA DHACAY Q/DAHARE

Shir ayaa waxaa uu ka dhacay Axadii la soo dhaafay 27-06-2010 magaalada Q/dahare, shirkaa ayaa Munaasabadiisu ahayd 20 Saney oo ah maalintii la aasaasay Xisbiga talada deegaanka haya ee (X.D.SH.S) shirkaa ayaa waxaa lagu casuumay Waftigii UWSLF ee joogay Degmada Q/dahare.
shirka ayaa waxaa isugu yimid dad fara badan waxaana shirka ugu horeynaba furay Gudoomiyaha Degmada Q/dahare Maxamuud Islaam oo hadal kooban uu halkaa ka soo jeediyay ayaa wuxuu uga war bixiyay xisbiga iyo xiligii la aasaasay iyo waxyaabihii uu u qabtay Shacabka Deegaanka ku dhaqan isaga oo sheegay in ay maanat tahay 12 Guuradii kasoo wareegtay Maalintii dhidibada loo taagay Xisbiga kadib wuxuu ku soo dhaweeyay Microphoneka Sh.Maxamed Dubad Xirsi, sheekha marka hore wuxuu u mahad celiyay shacabkii meesha isugu yimid sheekha ayaa hadalkiisa inta badan ay u badnayd mahad celin uu ga mahadcelinayo uruka Golaha sare ee ONLF tallaabadii geesinaimada lahayd ee ay qaadeen sheekha ayaa hadaladiisii waxaa ka mid ahaa   maanta waxaan aad ugu faraxsanahay go aanka ay qaateen walaalaheena ONLF ee geesinimada leh waxaad ogaataan reer qoraxayow in aan isku mid nahay una taaganahay soo dhaweynta walaalaheena  sheekha ayaa sidoo kale baaq u diray garabka kale ee aan wali isagu qaadan wadada nabadda waxaana hadaladii sii ka mid ahaa   walaalaheena kalena waxaan ugu baaqaynaa in ay tafaraaquna naga ilaaliyaan oo ay midnimada iyo kulanka ay nagula soo dhawaadaan  kadib waxaa microphone ka lagu soo dhaweeyay Sh.Maxamed Askar Khaliif oo isna hadal dheer ka jeediyay madasha shirka oo taabanayay dhinacyo kala duwan . Sheekha ayaa kahadlaya arrimo dhowr ah oo ay kamid yihiin Horumarka, Nabadgalyada, Dacwada iyo Talooyin uu siiyay qaybaha kala duwan ee Bulshada iyo Maamulkaba.

Sheekha ugu horeyn wuxuu ku billaabay wacdi Diini ah kadibna wuxuu Dadka ku booriyay in la adkeeyo nabadda hadda ka dhalatay Gobolka Allahna lagu mahdiyo oo aan lagu caasinin si nimcadu u sii daa imto.

Sidoo kale Sheekhu wuxuu ku dheeraaday ahmiyada uu Leeyahay Gobolka Soomaalida isagoo sheegay in Gobolka uu yahay Gobolka ugu khayraadka Badan Geeska Afrika isaga oo intaa raaciyay in gobolka waxa kaliya ee uu u Baahanyahay ay tahay Nabad.

Shekh Askar ayaa sidoo kale Waano iyo Talooyin u ujeediyay Maamulka Gobolka isagoo ugu Baaqay in ay shacabka u Cadaalad Falaan oo ayna u kala eeXanin Maalmaha yar e ay meesha mas uul ka yihiin ama ay xilka u hayaan Shacabka Ruux walbana laxisaabin Doono waxa uu Ummada u Qabtay Aduun iyo Aakhariba.

Waxaa kale oo uu baaq u Jeediyay Ciidamada Qalabka sida Gaar ahaan Ciidamada Booliska isaga oo ugu Baaqay in ay shacabka u dhimriyaan oo ay wax kabadalaan dhaqamadoodii horay loogu yaqaanay wuxuuna sheegay Sheekhu in maalmihii lasoo dhaafay ay Magaalada kajirtay dadka oo habeenkii Guryaha loogu dhaco siiba Dumarka kadibna habeenimo lagala soo boxo Guryahooda loona taxaabo Xabsiga, Sheekha ayaa aad oogu Dheeraaday in arintaa lajoojiyo oo ay oo ay meel kadhac iyo gaf wayn ay kutahay sharciga Islaamka iyo Dhaqanka Wanaagasan ee Soomaalida iyo Sharciga u yaala Dalka, waxaa intaa kudaray sheekhu in Ruuxii laso Xidhayo Si Sharci ah loo maro Dumarkana la xaqdhowro Maadaama ay yihii Dad Daciif ah
Shacabkii kasoo qayb galay shirka ayaa si wayn usoo dhaweeyay Qodobadii looga hadlay Shirka Mahad Ballaadhana u Jeediyay Wafdigii UWSLF ee halkaasi kusugnaa. Shiraka ayaa ugu dambayntii ku soo gaba gaboobay Jawi Wanaagsan iyo Rayn rayn

WAFDIGA OO BOOQDAY CISBITAALKA WAYN EE QABRI-DAHARE

Maalintii Arbacada oo ay Taariikhdu ahayd 28/06/2010 waxaa Booqoasho kutagay Cisbitaalka Guud ee Gobalka Qoraxay Wafdi kasocda UWSLF waxaana halkaa si diiran ugu soo dhaweeyay madax Cisbitaalka Dr: Mulugeta Lemma isla markaana ahna Diktoor takhasus u leh Qaliinka

Diktoorka ayaa Wafdiga kusoo wareejiyay Dhamaan qaybaha uu ka koobanyahay Cisbitaalka sida: Qaybta daryeelka Hooyada iyo dhallaanka, Qaybta Dhalmada, Xarunta Neersiga, Waaxda xanaanada Caruurta, Qaybta Raajitada, Qaybta Qaliinka, Iyo qaybo kale oo ay eegga Dhismayaal ku socdeen waxaana dhisayay Ha ado ka shaqeeya samafal .

Ugu Horayntii Waxaan ku Hormarnay Qaybta Dhalmada Waxaana halkaa kula kulanay Dumar badan oo ku umalay Cisbitaalka wajiyadooda laga dareemayay Caafimaad waxaana ka mid ahaa Gabadh Baadiyaha laga keenay oo ku soo silicday kadibna qalliin lagu sameeyay Allana uu u sahlay si fududna ay Cisbitaalka ugu umashay

Dr.Mulugeta Lemma oo Waraysi Gaaban siiyay Shabakadda Soomaaligalbeed.com ayaa u sheegay in Cisbitaalka ay ka caawiso xagga daawada Hay,ad Lagu magacaabo (MEDEINS DU MOND) cisbiyaalkuna uu haysto daawo ku filan waxaa kaloo uu noo Xaqiijayay in ay Daawadu tahay Lacag la,aan sidoo kalana Dhamaan howlaha uu qabto Cisbitaalku ay yihiin lacag la,aan sida Qaliinka noocyadiisa kala duwan.

Waxaa kale oo xusid mudan in Cisbitaalku uu leeyahay hal Gaadhi oo Ambulance ah una baahanyahay ambalaasyo kale si ay howshu u sahlanaato sidaa waxaa yidhi Diktoorka Cisbitaalka.

Kadibna Wafdiga ayaa indha indhayn kusameeyay Xaalada Cisbitaalka iyaga oo ku soo maray Qaybahiisa kala Duwan waxaana ay indhahooda qabanayeen Bukaan badan oo Cisbitaalka kujira oo laga kala keenay Dhamaan Qaybaha uu ka Koobanyahay Gobalka Qoraxay iyo waliba Gobalada ku Dhaw dhaw.

Ugu dambayntii waftiga ayaa u mahadceliyay Shaqaalaha Isbitaalka Shaqadda ay umadda u hayaan wuxuuna ku booriyay in ay u dhabar adeygaan howshaa culus.

Waftigii socdaalka ku tagay Magaaladda Q/dahare ayaa halkaa ku sugnaa muddo Todobaad ah intii ay joogeena waxaa ka muuqatay jawi wanaagsan iyo horumar la taaban karo marka loo eego halkii ay ahayd billo ka hor.

Waftiga ayaa u mahad celinaya dhamaan Shacabka reer Qoraxay sidii qiimaha badnayd ee ay ugu soo dhaweeyeen magaalada iyadoo dhowr jeer la macsuumay.

Wabillahi Towfiiq
warbixintii  soomaaligalbeed.com

 

• < Prev
• Next >