Gabay Cusub: NABADI WAA DOOR Waxaa Tiriyay Maxamed Cabdi Gurxan

Labada magac guud ee “Nabad iyo colaad” waa kuwo aad u da’ wayn, lana kowsaday jiritaanka aadanaha. Ka hor intaan taariikhda la qorin, xilli-taariikheedyada loo yaqaanno “Waayadii arahsiga” iyo “Waayadii ugaadhsiga” dadka waa ay dhexmari jireen colaad iyo nabad labaduba, balse hadba midka ay doortaan labada qolo ee is haysaa, ayay dhaqayadeed maali jireen.

Kuwa colaadda doorta, waxay u badnayd, in ay labaduba tirtirmaan ama in midkood la jabiyo oo la gumeeyo. Kuwa nabadda doorta, waxay u badnayd, in labaduba badhaadhaan oo nabad ku wada noolaadaan. Waayadaas, aaladaha iyo xeeladaha dagaal ee la adeegsan jiray waxay ahaayeen kuwo waxyeeladoodu aad u yar tahay, una kooban tahay.

Nabaddu waa danta shacabka. Haddana, si nabad buuxda loo helo, xilka ugu horeeya, uguna waynu wuxuu saaran yahay waa shacabka deegaanka. Wuxuu saaran yahay muwaadin kasta oo u dhashay deegaanka, kuwa dalka gudihiisa ku nool (reer guuraaga, tuulo joogta iyo degmooyinkaba) iyo kuwa qurbo-joogta ah ee dibadaha ku nool, labadaba. Si nabad raagta loo gaadho, dadkuna uu u hiigsado horumar iyo badhaadhe, waxaa lagama maarmaan ah in dhammaan laga wada qayb qaato sugidda ammaanka. 

Hadaba, akhristoow, waxaan halkan idiinku soo bandhigaynaa Gabay Cusub. Gabaygan uu ugu magac daray “Nabadi waa door” waxaa tiriyay Hal Abuur Maxamed Cabdi Gurxan, 8dii bisha Agoosto ee Sannadka 2010.

Gorgor yohow daanshoonahayee samada duulaaya
Adigaan daruuraha cirkiyo duudo ku celinayne
Adigaan delli iyo ka dhicin dawyo dhaadheere
Dalkii adigaa durba gaadhiyoon dhexna ku daahayne
Adigaa waxaan kuu dirsado daacad ii fuline
Hadalka adigaan doorinayn dulucda maansadane
Daa’imkaan duraamani in aad nabad dawaaftaaye
Duddooyinkii Nogbeed iyo Jigjiga Dig iyo Baareyda
Dohdii Awaare iyo Dannood Doollo idilkeedba
Dahare dooxii Iimeey iyo Godey wabiga daantiisa
Degdeg fariintan iiga gee gabayga oo diiran

Ina Daahir iyo waxaad tidhaa duurgal horintiisa
Dalaabid aan dhammaan dadkay daawadood noqotay
Deeqida dadkaa wada noqdee loo dardaar weriyo
Daharkii ay lahaayeen dadkaa dacarta loo mariyay
Dadkaa dayro dhawr eef ka badan dayac ku soo raagay
Een duunyo xoolaad dhaqane caydha dalandooli
Ee dagaag inay wada noqdaan daaduf meeraysta
Dadabsiga dadkaas lagu dhuftaye dawinta loo jeexay
Dadkaa lagu sii diganahayee dawga laga tuuray
Ee duqay garaad lahayd dabamartiyo caaqil daadihiya
Dabro taagan waxaa lagu hayee sii dacgabinaaya
Daawaysi maxaan loogu dayin dujin intaad dhawran?
Waxaad dooni kaad duudsiyi ka daran daacad hadalkiiye
Duunkiyeel inaad daba gashaan idinkoo diimoon ah
Duuflaal maxaa idinka dhigay taladii loo diiday?

Daa’iro marbay kugu dhacdaayoo nuro ku diidaaye
Darxumana mid baad doorataa midina waa daw e
Duulkaad jeer is hayseen haddii daaqad laga saaro
Dakano waa hore tii ahayd haddase duugoowday
Durqumadeed waxaa kaaga roon ama dan loo qaatay
Dabarliic adigoon dagan ahayn ama diyo u xaydxaydan
Doonta iyo naakhuudaha inaad dakhalkii noqotaate
Nimanka raaskii dumaalayee daabbad kooraystay
Dibrin hore dhaxdiinaa ma jirin lays digdhaway jeere
Dulman baad dhaax wada ahaydeen qoloba daanteede
Dawliskii hadday iyagu qabteen ama darkii ceelka
Balse inay kuu doojiyaan wabaxna aad daaqdo
Ood danaanaha isu gashaan dalladda hoosteeda
Is dugaashi nimankii dalbayee wax idinla doonaayay
Dabbaan salkii in laga arkiyo diirad shiish gaaban
Dafdaflayn bay eedday xaajadaan daymo loo badine

Dunidu sabanba waa nooc dar iyo dabci u gooniyahe
Dunnada kuwii nala dhacaye duudsi nagu raagshay
Dululaati soow kuwa ka baxay waliba daanyaysan
Dulan wixii shalay kuu ahaa doobir kuu noqoye
Soow taa xaqii daahirayee yimid duleedkiinna
Deegaanka soow taa la dhisay dawlad idiin gaar ah
Soow taa korkiinna loo dallacay calankii dookhiina
Soow taa xadkuu dalkiinii lahaa qalinka lagu duugay
Soow taa degmo iyo gobol dunjiyu mudane soo dooran
Soow taa dadkiinoo madaxu xukunka daadihiyay
Soow taa diintii dhaqan iyo hiddaha ubadku daalacayo
Soow taa afkeenoo daabacan dugsiga darsi lagu siini
Soow taa taariikhdiinii dihnayd daaha laga qaaday
Soow taa wixii Dhergigu dafiray lagu damaashaadi
Doxore iyo dowdar lama noqdee waxaa dabuubtii ah
Waxaad dooyo u soo marteen dikhood degelka ciidiinu
Dooddi iyo dayac shaallee ma galo danbarkan uu dhiiqay

Gurxan dirgaday danankiyo daryaan aar dinaahini dheh
Dubbad wiilkii lagu curtiyo dayax laba qarsoonaa dheh
Dambasamo mahiigaan da’ana badhaha dayreed dheh
Kalaguur mayay daad dhigiyo dabshid colaadeed dheh
Wadar bisha iyo ururka dagana toddob dillaankii dheh
Dammani barbaar kuududa daleel ardaal dadabgalkii dheh
Danyar iyo dalandal kii ururshaa dirac lagu hirtaa dheh
Darab iyo halganka aad dugsani dibudhac weeyaan dheh
Qaarna dila qaarna didiya idinna dallici maysaan dheh
Damiir laawe iyo inta daba gashiyo danayste yeelkii dheh
Diihaal iyo colaad baa darane nabadi waa door dheh

• < Prev
• Next >