Xafiiska Caafimaadka DDSI Oo Kulan La Yeeshay Hay’adaha ay Bah-wadaagta Yihiin.

Jigjiga,(cakaaranews)jumce, 30ka, December, 2016. xafiiska caafimaadka DDSI ayaa kulan la yeeshay hay’adaha ay bah-wadaagta yihiin  xafiiska caafimaadka DDSI, kulankaasi oo ka  qabsoomay hoolka shirararka xafiiska caafimaadka DDSI ayaa waxay  ka soo qaybgalay masuuliyiinta xafiiska caafimaadka DDSI oo uu ugu horeeyo wasiirka xafiiska caafimaadka DDSI iyo masuuliyiinta ugu saraysa hay’adaha ay bahwadaagta yihiin xafiiska caafimaadka DDSI.

kulankaasi ayaa waxay    u jeedadiisu ahayd  sidii kor loogu sii qaadi lahaa wada shaqaynta iyo iskaashiga u dhaxeeya xafiiska caafimaadka DDSI iyo hay'adaha bahwadaagta la ah si midaysanna looga jawaabo xaaladaha deg dega ah ee adeega caafimaadka dadka sida; cudur dilaaca (disease outbreak) iyo  nafaqo darada.

Waxaana, ugu horayntii ka hadlay kulankaasi  wasiirka xafiiska caafimaadka DDSI mudane Xasan Ismaaciil. Isaga oo uga mahad celiyay masuuliyiinta hay’adaha ka soo qaybgalay  kulankan muhiim ka ah gaar ahaan kuwa meelaha fog fog ka yimid. Wasiirka ayaa intaasi ku daray  inay lagama maarmaan tahay  adkaynta  xidhiidhka  wadashaqayneed ee ka dhexeeya xafiiska iyo hay’adaha taas oo suurta galinaysa   sidii bulshada loogaga faa'iidayn lahaa Miisaaniyadaha kala duwan ee  ay hay'aduhu màamulaan iyo tan dawladaba.

Gaba-gabadii kulankan ayaa ku dhamaaday isfahan wanaagsan iyo go'aan midaysan oo lagu gaadhay in si wadajir ah loo sii dar-dar galiyo ka midha dhalinta qorshayaasha u yaala xafiiska caafimaadka DDSI iyo xoojinta xidhiidhka wada shaqayneed ee hay’adaha.