Qurba Joog U Dhalatay DDSI Oo Agab Caafimaad Ku Wareejiyay Xafiiska Caafimaadka DDSI

Jigjiga,(cakaaranews), khamiis, 24ka August, 2017. Xaflad lagula kala wareegayay agabka caafimaadka   noocyadiisa kala duwan oo ay qurba joog u dhalatay DDSI ka soo iibiyeen dalka dibadiisa ayaa ka dhacday hoolka shirarka ee huteelka ZM ee caasimada deegaanka.

Waxaana ka soo qaybgalay xafladan lagula kala wareegayay agabkan caafimaadka masuuliyiin Ka kala socotay xafiiska caafimaadka DDSI, xafiiska arimaha haweenka DDSI, wakaalada xidhiidhka  qurba joogta DDSI ururka horumarinta somalida itoobiya, wakaalada dabagalka dawooyinka iyo cuntooyinka DDSI, xubnaha qurba joogta  DDSI ee waday agabkan iyo marti sharaf kale.

Waxaana furitaankii xafladan ugu horayntii ka hadlay ku simaha wasiirka caafimaadka DDSI ahna gadhwadeenka geedi socodka qorshaynta xafiiska caafimaadka DDSI mudane Maxamed Ayaanle  Xasan oo ugu horayntii u mahad celiyay qurba joogtan soo gaadhsiiyay deegaanka agabka caafimaadka noocyadiisa kala duwan wuxuuna sheegay in qalabkan caafimaadka ee ay keeneen qurba joogtani kaalin mug leh ka qaadan doona dar-dargalinta adeegyada caafimaadka wuxuuna si gaar ah ugu mahad celiyay ururka haweenka jaaliyada DDSI ee wadanka Finland ee xarunta caafimaadka ka hirgaliyay caasimada gobolka Qoraxay  islamarkaan maanta keenay qalabkii ay ku shaqayn lahayd xarunta caafimaadka sidoo kale waxa uu u mahad celiyay masuulku jaaliyada DDSI ee wadanka dheermak ee soo gaadhsiiya deegaanka qalab caafimaad isaga oo intaasi ku daray in ay gaadhsiindoonaan goobihii loogu talagalay qalabkan

Dhankooda waxaa ka hadlay xafladan wasiirka arimaha haweenka iyo caruurta DDSI marwo Raxma Suldaan Maxamuud haybe iyo maareeye ku xigeenka ururka horumarinta soomalida itoobiya mudane Cabdilaahi Maxamed Cabdi kuwaasi oo si mug leh ugu mahad celiyay qurba joogtan soo gaadhsiiya deegaanka qalabka caafimaadka waxayna ka warbixiyeen kaalinka balaadhan ee ay qurba joogta u dhalatay deegaanku ku leeyihiin hirgalinta qorshayaasha horumarka deegaanka iyaga oo ku booriyay qurba joogtan in ay sii wadaan dadaalka ay kaga qayb qaadanayaan hirgalinta qorshayaasha horumarineed ee DDSI.

Dhankooda qurba joogtan u dhalatay deegaanka ee ka kala socotay jaaliyada DDSI ee wadanka dheermarki iyo ururka haweenka ee jaaliyada DDSI ee wadanka Finland oo ahaa kuwa deeqdan agabka caafimaadka waday oo  ka hadlay xafladan ayaa sheegay in ay markasta garab taagan yihiin xukuumada DDSI islamarkaana si mug leh uga qayb-qaadanayaan dadaalka loogu jiro taaba galinta qorshayaasha horumarineed ee DDSI waxayna sheegeen in ay qalabkan caafimaadka  oo ay ka soo iibiyeen dalka dibadiisa ugu talagaleen in ay kaga qayb-qaataan dadaalka ay xukuumada ugu jirto tayaynta adeegyada caafimaadka.

Ugu danbayntii waxaa xafladaasi shahaadooyin sharaf lagu gudoonsiiyay xubnihii jaaliyadaha DDSI ee soo gaadhsiiyay deeqdan agabka caafimaadka deegaanka