MW CMC Oo Kulan Soo Dhawayn Ah La Qaatay Shacabkii Oromada Ahaa Ee ku Soo Noqday Deegaanka.

Jigjiga,(cakaaranews),Isniin,4ta December, 2017. Madaxwaynaha DDSI mudane Cabdi Maxamuud Cumar ayaa kulan  baaladhan kula  qaatay madasha shirarka ee qaryaan dhoodaan ee caasimada deegaanka  shacabkii oromada ahaa ee horey uga barakacay deegaanka soomalida  oo dib ugu soo laabtay deegaanka iyo kuwii horey u sii joogay,  qaarka mid ah qoomiyadaha kale ku nool caasimada deegaanka ee jigjiga iyo gudiyadooda.

Haddaba, waxa  kulankaasi ka hadlay madaxwaynaha DDSI mudane Cabdi Maxamuud Cumar oo sheegay  in ujeedada kulankan  tahay sidii looga wada hadlilahaa  soo dhawaynta  shacabkii  oromada ahaa ee ka barakacay deegaanka  oo ay xukuumada DDSI iyo hogaaminta odayaal dhaqameedka deegaanka horey  baaq ugu  direen dhamaan shacabkii oromada ahaa ee ka barakacay deegaanka soomaalida in ay ku soo noqdaan   islamarkaana   lagu wareejinayo hantidii, guryihii, ganacsigoodii iyo waliba shaqooyinkii ay hayn jireen, kuwaasi  oo loo sii ilaalin jiray  oo gudiyo loo xilsaaray ee maamulka mgaalada jigjiga si rasmiya ugu  wareejinayaan , madaxwaynaha ayaa sheegay in ay xukuumada faderaalka iyo labada deegaanba ee soomalida iyo oromada hogaamintoodu uga wada  hadleen sidii dib loogu soo celinlahaa labada shacab deegaanada ay ka barakaceen taasi oo ay xukuumada DDSI bilowday soo celinta dadkii shacabka  oromada ahaa  ee ka barakacay deegaanka soomalida itoobiya . madaxwaynaha ayaa tilmaamay in dadka barakacay ee oromadu aysan kawada barakicin   deegaanka balse ay sidoodii u daganaayeen gobolada kale ee deegaanka  sidoo kalena aya jiraan  shaqaale u dhashay deegaanka oromada oo ka  shaqeeya xafiisyada dawlada deegaanka soomalida itoobiya oo aan ka tagin siina wata shaqooyinkooda, madaxwaynaha ayaa  ku booriyay qaybaha kala duwan ee bulshada iyo gudiyada loo xilsaaray dadka barakacay ee ku  soo noqonaya deegaanka in xilwayn iska   saaraan  soo dhawaynta  dadkii shacabka  ah ee ku soo noqonaya deegaanka  gaar ahaan caasimada deegaanka ee jigjiga.

Dhinaca kale qaarka mid ah shacabkii oromada ahaa ee horey uga barakacay deegaanka soomalida itoobiya ee ku soo laabtay caasimada deegaanka ee jigjiga oo ka hadlay kulankaasi ayaa siwayn ugu mahad naqay xukuumada DDSI iyo shacabka deegaanka waxayna, ka warbixiyeen sida quruxda badan ee loogu soo dhaweeyay deegaanka islamarkaana loogu wareejiyay hantidii ay ka barakaceen oo sidii ay kaga tageen loogu sii xifdiyay waxayna ugu baaqeen shacabka kale ee aan wali soo noqon in ay ku soo noqdaan deegaanka soomalida itoobiya  oo lagu soo dhawayndoona hantidoodiina sidii ay kaga tageen u tahay  waxayna ka warbixiyeen mudada dheer ee ay  deegaanka soomalida itoobiya  ku noolaayeen iyo sida nabadgalyada ah ee ay ugu noolaan jireen iyo waliba sida ayna u kala maarayn   labada shacab ee deegaanka soomalida  iyo oromadu islamarkaana  yihiin shacab  walaalo ah oo  daris ah.