Xuska Sanadguurada 12aad Ee 29ka Hidhaar Oo Laga Xusay Xarunta Deegaanka Ee Jigjiga

Jigjiga(Cakaaranews) Jumce 8da December 2017. Waxaa magaalada samara ee caasimada deegaanka canfarta si balaadhan loogu xusay xuska sanadguurada 12aad ee 29ka hidhaar iyadoo sidoo kalana xarunta deegaanka ee mgalaada jigjiga si heer sare ah looga xusay xuska sanadguurada 12aad ee 29ka Hidhaar oo ah maalinta qoomiyadaha iyo shucuubta dalkeena itoobiya.

Hadaba xuska sanadguurada 12aad ee 29ka Hidhaar ee lagu xusayay xarunta deegaanka ee magaalada jigjiga oo ay kasoo qaybgaleen mas’uuliyiinn sare oo heer deegaan ah oo ay ugu horayso madaxwayne kuxigeenka DDSI ahna wasiirka xafiiska horumarinta beeraha iyo khayraadka dabiiciga ah marwo Sucaad Axmed Faarax, Wasiirka Xafiiska maamulka DDSI mudane Cabdimahad Maxamed Cabaase, Wasiirka xafiiska ganacsiga gaadiidka iyo warshadaha DDSI ahna madaxa arrimaha xisbiga ee xarunta dhexe mudane Khadar Cabdi Ismaaciil, Shaqaalaha xafiisyada heer deegaan, Odayaal dhaqameedka deegaanka , Dhalinyarta qaybaha kaladuwan ee bulshada iyo  marti sharaf kale ayaa waxaa furitaankiisii ka hadlay madaxwayne kuxigeenka DDSI ahna wasiirka xafiiska horumarinta beeraha iyo khayraadka dabiiciga ah marwo Sucaad Axmed Faarax oo ugu horayn u hambalyaysay dhamaan qoomiyadaha iyo shucuubaha dalka gaar ahaan shacabka DDSI islamarkaana sheegtay in 29ka hidhaar tahay maalin qaali ah oo ay isugu yimaadaan dhamaan qoomiyadaha iyo shucuubta dalkeena itoobiya. Waxayna madaxwayne kuxigeenku intaa ku dartay in manta ay tahay maalin ku timid halgankii lasoo maray. Sidoo kale madaxwayne kuxigeenka ayaa xusay in qoomiyada soomaalidu  tahay qoomiyada ugu horaysa ee adkaynaysa nidaamka federalismka ah islamarkaana ay difaacayaan cid walba oo cadaw ku ah nidaamka federalismka iyadoo intaa kudartay in ciidanka gaarka ah ee deegaanku yahay ciidan utaagan nabadgalyada dalka islamarkaana ay yihiin kuwa ay jiritaankoodu  nabad ugu hurdaan dhamaan qoomiyadaha dalka.

Dhankiisa waxaa isana xuskan sanadguurada 12aad ee 29ka hidhaar ka hadlay maayarka magaalada jigjiga mudane Ibraahim Maxamuud Mubaarak oo sheegay in maanta tahay maalin ku wayn dhamaan qoomiyadaha dalkeena islamarkaana tahay maalin cadaynaysa sinaanta iyo cadaalada ka jira dalkeena itoobiya.

Ugu danbayna waxaa dhankooda ka hadlay odayaal dhaqameedka deegaanka oo si faahfaahsan ugu hadalay sooyaalkii taariikheed ee uu dalka iyo deegaankuba soomaray islamarkaana tilmaamay in 29ka hidhaar tahay maalin qaali ah oo tilmaamaysa in dhamaan qoomiyadaha dalku siman yihiin.