Kal’fadhigii 6aad Ee Golaha 5aad Ee Xildhibaanada DDSI Oo Maalintii Labaad Galay

Jigjiga(Cakaaranews) Khamiis, 1da, March 2018.  Waxaa maalintii labaad galay kal’fadhigii 6aad ee golaha 5aad ee xildhibaanada DDSI oo maalintii shalay ahayd ka furmay xarunta deegaanka ee magaalada jigjiga gaar ahaan hoolka shirarka ee qaryaan dhoodaan.

Hadaba kal’fadhigan 6aad ee golaha 5aad ee xildhibaanada DDSI ayaa waxuu madaxwaynaha DDSI mudane Cabdi Maxamuud Cumar kasoo jeediyay warbixintii waxqabadka xukuumada  6dii bilood ee igu danbaysay taas oo ka hadlaysay guulaha laga gaadhay taabagalinta qorshayaasha horumarineed ee deegaanka gaar ahaan dhinacyada horumarinta khayraadka biyaha, beeraha, waxbarashada, caafimaadka, jidadka, horumarinta waraabka iyo dooxooyinka. Sidoo kale madaxwaynaha ayaa si gaar ah uxusay in waxqabadka xukuumadu ay xooga saartay qodista ceelasha dhaadheer iyo macaanaynta ceelasha biyaha khadhaadh ee deegaanka, Isagoo madaxwaynuhu carabka ku dhuftay in xukuumada DDSI ay ku guulaysatay in deegaanku maanta isu furmay dhanka isusocodka 100% islamarkaana laga hirgaliyay buundooyin tayo leh oo dhaxalgal ah.

Ugu danbayna waxaa falanqayn iyo dood dheer kadib ay  goluhu codbuuxa ku ansixiyeen  warbixintii waxqabadka xukuumada  lixdii bilood ee danbaysay iyadoo uu kal’fadhigan 6aad ee golaha 5aad ee xildhibaanada DDSI uu maalmahan soosocda halkaas kasii socondoono.