MW CMC Oo Tababar U Furay 600 Oo Qof Oo Kamid Ah Hogaaminta Dhexe Ee Gobolada, MM Iyo Degmooyinka Deegaanka

Jigjiga(cakaaranews)Isniin, 25ka, June, 2018. Waxaa kuliyada maaraynta iyo adeega shacabka DDSI si habsami leh uga bilawday tababar loo qabtay hogaaminta dhexe ee  gobolada, degmooyinka iyo MM deegaanka. kuwaas oo ay tiradoodu dhantahay 600 oo xubnood. Iyadoo tababarkana ay kasooqaybagleen hogaaminta ugu saraysa deegaanka oo ugu horeeyo Madaxwaynaha DDSI mudane Cabdi Maxamuud Cumar, Afhayeenka Golaha Baarlamaanka ahna madaxa arrimaha Xisbiga ee Xarunta dhexe ee XDSHSI iyo waliba masuuliyiin kale.

Hadaba, tababarkan ayaa waxaa ugu horayn furitaankiisii kahadlay Madaxwaynaha DDSI Mudane Cabdi Maxmuud Cumar oo ugu horayn u mahadceliyay hogaaminta dhexe ee degmooyinka, mm iyo gobolada ee kasooqaybgalay tababarkan. Wuxuuna madaxwaynuhu sheegay in tababarkani yahay mid lagu kobcinayo garaadka aqoomeed ee hogaaminta dhexe islamarkaana lagu dardargalinayo korra loogu qaadayo awooda fulineed iyo gudashada waajibaadka shaqo ee hogaaminta dhexe ee degmooyinka MM iyo Gobolada.

Sidookale,  madaxwaynaha oo hadalkiisa sii wata ayaa tilmaamay in tababarkani yahay mid loogu talagalay hogaaminta dhexe islamarkaana uu san ahayn tababar arday iyo macalin ah balse uu yahay tababar cilmi iyo aqoon lagu kala faa’iidaysanayo. Kaas oo  la isku waydaarsanyo doodo iyo macluumaadyo badan. Wuxuuna carabka kudhuftay in tababartayaasha looga baahan yahay in qofkasta uu kaqaybqaato isagoo fikirkiisa khibradiisa iyo cilmigiisaba soo bandhigaya.

Ugudanbayna, Madaxwaynaha ayaa kula dardaarmay kaqaybgalayaasha tababarka inay ilaaliyaan wakhtiga iyo saacadaha casharka islamarkaana ay si fiican uga faaiidaystaan mudada uu tababarku socdo. Wuxuuna madaxwaynuhu carabka ku adkeeyay in hogaaminta dhexe ee tababarkan qaadanaysa looga baahan yahay in tababarkan cilmiga ay kabartaan ay usii gudbinayaan bulshadii iyo goobihii ay kakala yimaadeen.